2026 жылғы 4 мамыр күні Мирас университетінің студенттерімен Шымкент қаласындағы Ж. Шанин атындағы қалалық академиялық драма театрына экскурсия ұйымдастырылды.
Экскурсияның негізгі мақсаты – студенттердің мәдени-рухани деңгейін арттыру, театр өнері арқылы эстетикалық талғамын қалыптастыру, сондай-ақ олардың көркем шығармаларды қабылдау және талдау қабілеттерін дамыту болып табылады. Сонымен қатар, студенттерді ұлттық құндылықтарға құрметпен қарауға тәрбиелеу және бос уақыттарын тиімді ұйымдастыру да іс-шараның маңызды міндеттерінің бірі болды.
Экскурсия барысында студенттер театрдың қызметімен, шығармашылық үдерісімен және сахналық қойылымдардың дайындалу ерекшеліктерімен танысты. Театрдың ішкі құрылымы, актерлік шеберлік, режиссура және сахналық мәдениет туралы жалпы мағлұматтар берілді.
Іс-шара аясында студенттер «Тастамашы ана» спектаклін тамашалады. Қойылымда ананың тағдыры, өмірдің қиындықтары, әлеуметтік мәселелер мен адамгершілік құндылықтар кеңінен көрініс тапқан. Спектакль мазмұны студенттерге терең әсер қалдырып, олардың өмірлік көзқарастарының қалыптасуына оң ықпал етті.
Экскурсия нәтижесінде студенттердің театр өнеріне деген қызығушылығы артып, мәдениет пен өнерге деген құрметі нығая түсті. Осындай іс-шаралар студенттердің жан-жақты дамуына, олардың рухани және адамгершілік құндылықтарының қалыптасуына үлкен септігін тигізеді.
